Yá ta a la venta el llibru de L'Ablanera

Estos díes yá ta a la venta un nuevu llibru n'Asturies. Trátase del primer álbum ilustráu del simpáticu personaxe de L'Ablanera, creada pol escritor y ilustrador, Enrique Carballeira.

El llibru recueye la lleenda d'esti personaxe, asina como tres histories nes que podemos afondar nun universu de biesques, montes, maxa y personaxes mui orixinales.

· Fada de la biesca

L'Ablanera ye una fada, una bruxa bona de la biesca asturiana. Recueye ablanes y almacénales pa repartiles na nueche de Navidá, xunto con sacos de regalos, per toles cases d'Asturies.

Amás de nesti llibru, el personaxe apaeció en dellos capítulos de "Los Cuentos de Trazu Sueltu", emitíos pol canal de televisión online "PlayPresta" y fechos pol autor.

El nuevu llibru cunta con ilustraciones a color y tien formatu cuadráu, con 36 páxines.

Pue comprase online, pidiéndolu per email, o nes tiendes de l'Infiestu "Librería Rima", "Carmel" y "Librería Jambrina".